Other languages with Google Translate

Use Google to automatically translate this website. We take no responsibility for the accuracy of the translation.

Risttalaš osku

Vuođđu ja ulbmil risttalaš oskkus lea ráhkisvuohta. Ráhkisvuohta vuolgá Ipmilis. Ráhkisvuohta addá eallima.

Jahkku lea osku

Risttalaš jáhkku lea oskkut Ipmilii guhte addá ándagassii ja mas lea láđisvuohta, son gávdno álo min eallimis ja addá doarjaga, láidesteami ja ođasmahttima. Daddjo ahte ii giige leat goassege oaidnán Ipmila. Jesus Kristusis ja su eallima daguid bokte mii máhttit dovdagoahtit Ipmila. Mii máhttit oaidnit gii ja makkár Ipmil lea. Danne leat Biibala muitalusat Jesusa birra risttalaš oskku guovddážis.

Rohkadallan guoddá

Dábáleamos geaidnu oskkui lea rohkadallan. Don ii dárbbaš oskkut jus áiggut rohkadallat, máhtát álgit rohkadallamiin.

Rohkadallan lea rabas váimmu ja Ipmila váinnuheami birra. Rohkos máhttá leat Ipmiliin hupmat dahje orrut jaska Ipmila ovddas. Rohkos máhttá lea muitaleapmi, bivdit veahki, giitit ja várra dat deháleamos: addit iežas Ipmilii. Hearrá buressivdnádus ja Hearrá rohkos gávdno oarjánsámegillii.

Risttalaš oskkudovddasteapmi

Risttalaš girku dovddasta ovtta áidna Ipmilii- Áhči, Bártni ja Bassivuoiŋŋa- mat luvvet, gádjut ja addet eallima.

Ruoŧa girku lea oassi máilmmiviidosaš girkus ja juohká risttalaš oskkudovddasteami ja máidnu bassi golbmaoktalašvuođa.

Jáhkku boahtá ovdán oskkudovddasteami bokte, sániid ja daguid čađa. Dát lea árbi apostalkihtalaš áiggi rájis. Oskkudovddasteapmi govahallá maiddái jáhku, geahččaleapmi čilget oskku vuđolaš sisdoalu, muhto ii ieš dan oskku.

Golbma boarrásit oskkudovddastemiin lea sierra sajádat ja dat govahallet oskku ja girku bissuma jahkečuđiid čađa. Apostalkihtalaš oskkudovddasteapmi oarjánsámegillii.

Evangelalaš-luhteránalaš girku

Ruoŧa girku gullá evangelalaš- luhteránalaš árbevirrui, dat ovttastuvvo dovddastusčállosa bokte, dat mii vuolgá jagi 1530 Augsburgalaš dovddastusas. Reforma áiggis ledje dovddastusčállosat čájeheaddji duođaštusat dasa movt oskku bokte oaččui vástádusaid dan áiggi jearaldagaide.

Apoastallaš oskkudovddastus

Mii oskkut Ipmil Áhččái, buotveagalažžii,
almmi ja eatnama sivdnideaddjái.
Mun oskkun Jesus Kristusii,
Ipmila áidnoriegádan Bárdnái, min Hearrái,
guhte sahkanii Bassi Vuoiŋŋas,
riegádii nieiddas Márjjás,
givssiduvvui Pontius Pilatusa áiggi,
russiinávlejuvvui, jámii ja hávdáduvvui,
njiejai jábmiid riikii,
bajásčuožžilii jábmiid luhtte goalmmát beaivvi,
manai bajás albmái,
čohkká Ipmila, buotveagalaš Áhči, olgeš gieđa bealde,
boahtá fas doppe dubmet
elliid ja jábmiid.
Mii oskkut Bassi Vuigŋii,
bassi aktasaš girku,
bassi olbmuid searvevuođa, suttuid ándagassii addojumi,
oačči bajásčuožžileami ja agálaš eallima.
Amen.

Nikealaš oskkudovddastus

Mon oskun ovtta Ipmilii, Buotveagalaš Áhččái, almmi ja eatnama, buot oinnolaččaid ja oaidnemeahttumiid Sivdnideaddjái;
ja ovtta Hearrái, Jesus Kristusii, Ipmila áidnoriegádan Bárdnái, guhte lea riegádan Áhčis ovdal buot áiggiid, Ipmil Ipmilis, čuovggas čuovgasis, duohta Ipmil duohta Ipmilis, riegádan, ii sivdniduvvon, geas lea seammá luondu go Áhčis ja gean bokte buot lea šaddan; guhte min olbmuid ja min bestojumi dihtii njiejai almmis, šattai oažžin Bassi Vuoiŋŋa bokte ja nieiddas Márjjás ja šattai olmmožin;
 russiinávlejuvvui min ovddas Pontius Pilatusa áiggi, gillái ja hávdáduvvui; bajásčuožžilii jábmiid luhtte goalmmát beaivvi čállagiid mielde, manai bajás albmái, čohkká Áhči olgeš gieđa bealde; boahtá fas hearvásvuođas dubmet elliid ja jábmiid ja gean riikkas ii leat loahppa;
ja Bassi Vuigŋii, Hearrái ja eallindahkkái, guhte vuolgá Áhčis ja Bártnis, guhte ovttas Áhčiin ja Bártniin rohkadallojuvvo ja gudnejahttojuvvo ja guhte lea sárdnon profehtaid bokte; ja ovtta, bassi, aktasaš ja apoastallaš girku.
Mon dovddastan ovtta gástta suttuid ándagassii addojupmin ja vuordit jábmiid bajásčuožžileami ja boahttevaš máilmmi eallima. Amen.