Foto: Alexander Leijon /Ikon

Jábmem ja hávddádus

Hávddádusán tjåhkanip jábmema ja láhppema birra. Hivástahttep lagosulmutjav ja Jubmelij suv guodep.

Hávddádusdåjmadahka ja Girkko doarjjan

Lagámusáj jábmem la muhtem stuorámus rievddádusájs viessomájge. Goappátjagá hávddádusdåjmadahka ja tjoaggulvis gávnnu lahkusin dårjutjit ja viehkedittjat. Álgon la buorre aktavuodav hávddádusdåjmadagájn válldet. Sij viehkedi duv vijdábut. Hávddádusdåjmadahka aktavuodav tjoaggulvisájn válldá ja viehket hávddesajev ja härráv diŋŋgot. Jus sidá sámegielak jali guovtegielak härráv hávddádussaj de galga hávddádusdåjmadahkaj jali duv tjoaggulvissaj giehttot ruvva máhttelis.

Máksá hávddádusdåjmadagáv bargadahttet ja lagámusá ietja máhtti mierredit man ålov sihti hávddádusdåjmadahka barggá, ja makkár dievnojt sihti adnet. Hávddádusjubmeldievnno aktan härrájn ja girkko lanjá li mávsodagi jus vássám ulmusj lij sebrulasj Svieriga girkkon.

Gárvvima hávddádusá åvddåla

Hávddádusá ja girkko jali kapella diŋŋgoma maŋŋela härrá lagámusájt iejvvi. Buorre l tjåhkanit juogu de hejman jali girkko lanjájn hávddádusáv gárvvitjit. Ájnas la härrá diedov oadtju gut la hávddáduvátjit ja makkár sávadusá lagámusájn li hávddádusá hárráj.

Sáhkadattijn aktan tjadát gåk hávddádusáv sihtá dåjmadit, ja vássám ulmutja viessoma ja jábmema birra. 

Hávde buorissjivnnjádus

Hávddádus máhttelissan dahká aktan surggat, gijttet ja hivástahttet. Musijkka, lávlloma ja råhkålvisá li árvulasj ja åskåldis vuoge jábbmegav Jubmela hállduj guodet.

Jus lagámusá válljiji boalldet de ålles hávddádusjubmeldievnno álu girkkon jali kapellan la. Jus lagámusá válljiji gisstohávddádusáv de jubmeldievno maŋŋegietjen máhttá aktan hávddáj mannat gistov dasi luojtátjit. Muhttijn li juo sierra årijs boalldám åvddål hávddádusá ja de gudnalihtev adná hávddádusán ienni gå gistov. Lihtev máhttá ednamij hávddádusjubmeldievno maŋŋegietjen luojttet.

Lága milta hávddádusáv galggá máno sinna jábmema maŋŋela adnet. Gå boalldá gudna álu ednamij luojteduvvá esski hávddádusá maŋŋela, valla maŋemusát jagev boalldema maŋŋela.

Mujttobåddå

Hávddádusjubmeldievno maŋŋela máhttá buoragit dåbddut hávddáduskaffáj tjåhkanit, buojkulvisssan tjoaggulvislanján jali lagámusáj lunna. Mujttobåttå máhttá rádnajt ja berrahijt iejvvit vássám ulmutjav mujtátjit. Jus lagámusá sihti härrá aj mujttobåddåj säbrrá de buorre la dav giehttot juo hávddádusá åvddåla.

Gájkka gullu ietjas ájggáj, gávnnu ájgge gájkkaj alme vuolen.

Sárnnediddje 3:1

Ienemus tjoaggulvislanjájt máhttá mávsodagi mujttobåddåj diŋŋgot. Bårråmsajev máhttá de diŋŋgot hávddádusdåjmadagá jali tjoaggulvisá tjadá.

Hávddádusá maŋŋela

Ållo surgulattja adni låsemus ájgge boahtá esski hávddádusá maŋŋela. Guorosvuohta. Härrá ja diakåvnå tjoaggulvisán li duv guoran surggoájge. Ålon tjoaggulvisán li aj surggojuohkusa. Surggojuohkusijn máhttá dåbdojt jábmemis ja láhppemis aktan juogadit iehtjádij gudi aj surggi. Ij aktak dárbaha aktu årrot.

Diededibme hávddádusdåjma birra

Gåktu hávddádus Svierigin dåjmaduvvá? 
Mij la hávddádusmákso ja mejt dat sisadná?
Lågå ienebuv gåk hávddádus doajmmá dánna.

Gåvvå: Aleksander Lejon/IKON

Vuostasj viehkke surggobále (Lulesamiska)

Oajvvadusá ma álkkebun dahki surgulattja guoran gávnnut

Gå viessom ietjájduvvá

Dáhpádusá ma ietjájduhtti mijá viessomav máhtti stuorámus ávos jali tjiegŋalamos surgos bájnedum. Gå ådå ulmusj riegát ja fuolkke lassán ådå sebrulattjajn jali gå venak jábma ja viessom dåbddu låssåt.
Svieriga girkko sihtá doarjjan ja viehkken årrot ájnas- muhttijn låsså - vidjurijn majt viessom midjij buktá.
Svieriga girkko sihtá dårvvon årrot ávon ja surgon ja máhttá, sijá ritualaj ja symbolladagoj, doarjjan ja viehkken årrot gå mijá viessoma ietjájduvvi.
Jubmela gieresvuohta ja hukso gåbttjå gájkka ulmutjijt viessoma umasslágásj ájgijn.

Hávddádusdoajmma

Svieriga girkko l oajvvedåjmadiddje hávddádusdoajmmaj ålles rijkan, ietján gå Stockholma stádan ja Tranåsan manna kommuvnna l oajvvedåjmadiddje.
Hávddádusoajvvedåjmadiddje åvdåsvásstet iehtjádij siegen fállat hávddesajev, hávddádimev, kremerimav ja lanjáv hávddádussermoniddjaj. Mávsedum la hávddádusmávso baktu majt gájka máksi juska vil la sebrulasj Svieriga girkkon jali ij. Jus jábbmek lij sebrulasj Svieriga girkkon de li aj girkko ietjá dievnastusá nåvkå.

 

Hávddádus

Hávddádus la gåbdemus perspektijvan vuohke stuovagit jábbmegav hállduj válldet ja symbolladago gasskavuodajn dasi.
Hávddádus la ållesvuohta mij máhttá juogeduvvat gålmån umasslágásj oajvvesuorgen: praktijkalasj dago, hávddádusseremoniddja ja hávddádibme.
Plánim, praktijkalasj gárvedime ja aktidibme l jábbmegaoame åvdåsvásstádus. Dajna máhttá hávddádusentreprenerra viehkedit.

Hávddádusseremoniddja mij la härrás lájddidum girkkon jali kapellan la gåhtjudum hávddádusjubmeldievnno. Mávsedum la juo girkkomávso baktu ja jus jábbmek lij sebrulasj Svieriga girkkon de danen älla duodde gålo.