Prata med oss

Sebrulasjvuohta

Svieriga girkkon li vargga gietjav miljåvnå sebrulattja. Juohkka jage sijás ieneplåhko säbrrá girkko muhtem aktijvuodajda. Máhttá årrot unna kåvrån lánndadáfon, konfirmasjåvnnålägerin jali tjoaggemin Svieriga girkko rijkajgasskasasj bargguj doarjjaj ja åvddånibmáj.


Hiejtedit sebrulasjvuodav Svieriga girkkos
Jus dån mierreda hiejtedit sebrulasjvuodav Svieriga girkkos de dav diededa duv bájkálasj tjoaggulvissaj. Máhtá riŋŋgit, manádit jali tjállet duv tjoaggulvissaj ja adnot blankehtav hiejtedibmáj. Dån máhtá aj rádjat persåvnålasj vuollájtjáledum adnomav dábálasj brevan ja rádjat dav tjoaggulvissaj. Jus dån illa visses makkir tjoaggulvissaj gullu de máhtá dav åhtsåt sválldasa baktu rievtesbielen.

Hávddádimgållo
Bakku hávddádimgållo mávseduvvá gájkajs gudi li álmmuktjáledum Svierigin. Rijkkagasskamierre gålluj 2011 la 0,24 prosenta duv värrodahtte sisboados kommuvnnaj. Svieriga girkko l oajvveålmåj hávddádimdoajmmaj Svierigin, ietján gå Stockholma stáda ja Tranåsa kommuvnna. Deklarasjåvnnåblankehtan máhtá vuojnnet duv girkkomávsov ja hávddádimgålov.

Man ednagav mávsá sebrulasjvuohtamáksuj mierreduvvá guovtet oases: duv sisboahto ja makkir tjoaggulvissaj gullu. Rijkkagasskamierre girkkomáksuj 2011 la 0,99 prosenta duv värrodahtte sisboados kommuvnnaj.

Sebrulasjmákso
Svieriga girkko doajmma Svierigin ja ålggorijkan mávsedvvá sebrulasjmávsos, mij aj gåhtjudallá girkkomákson. Ienemusá vatteduvvi duv bájkalasj tjoaggulvissaj. Mákso galggá rähkkut juohkkabäjvvásasj bargguj mánáj, nuoraj ja vuorrasappuj, kåvråjda ja jubttsatjiegajda, skihpadåhpegirkkuj, fuolkkerádevaddemij, juorabargge härrájda, gávnadimsajijda ja dåjmajda ulmutjida gudi li aktu ja hejmadisulmutjijda. Gájka máksep aj bájke girkkohuodnahij ja kultuvrrahistårjalasj árvoj gähttjuj boahtte buolvajda.

Jus dån la juo gástadum ietjá ristagis siebren de máhtá sjaddat sebrulattjan Svieriga girkkon ságastime maŋŋela girkkohärrájn. Dån gut la häjttám sebrulasjvuodav Svieriga girkkon duostoduvá ruoptus sebrulattjan. Jus illa visses jus dån la sebrulasj jali dujna li ietjá gatjálvisá sebrulasjvuoda birra de aktavuodav válde tjoaggulvisájn gånnå åro.

Gatjálvisá sebrulasjvuoda birra
Svierigin åvdebut sjattaj automáhtalattjat sebrulasj Svieriga girkkon riegádimen. Uddni sebrulattjan sjatta gástadime baktu. Goappátjagá máná, tonåringa ja vuorrasappo máhtti gástaduvvat. Jus mánná ij la gástadum de sujttoaddne máhttá diededit sijá mánná galggá sebrulattjan årrot Svieriga girkkon. Máná gudi li lågenanguovte jage vuorrasappo galggi ietja miededit.

Vásse jahke siffarin

2009 jahke:

  • dagáduvvin 18 miljåvnå jubmeldievnnoguossidime
  • ienep gå 100 000 ulmutja lávllun kåvrån Svieriga girkkon
  • gávnnujin ienep gå 5 500 kåvrå
  • svieriga álmmugis 71,3 prosenta lidjin sebrulattja Svieriga girkkon
  • gájkka riegádimmánájs 56 prosenta gástaduvvin
  • säbrrin gájkka 15-jagágijs 32 prosenta skallujlåhkkebargon
  • vargga 11 500 skåvllåklássa guossiduvvin Svieriga girkkos
  • Svieriga girkko åvdåsvásstedij gajkka fiesstimijs 40,9 prosenta Svierigin
  • dagáduvvin gájkka hávddádimijs 83 prosenta Svieriga girkkon

Sidá gus dån sebrulattjan sjaddat?

Dievde sisiboahtemblankehtav ja rája blankehtav tjoaggulvissaj gånnå åro. Dån máhtá aj ietjat milta hábmádit dábálasj brevan. Tjoaggulvis de dujna aktavuodav válldá.

Máhttelis la aj iesj manádit tjoaggulvisá ekspedisjåvnån persåvnålattjat åtsåtjit sebrulasjvuodav Svieriga girkkon. Sidá de härrájn ságastit.

Álmmuktjáledum Svieriga ålggolin

Jus dån illa álmmuktjáledum Svierigin de máhtá tjálalattjat åhtsåt sebralasjvuodav Girkkostivran/ Kyrkostyrelsen, 751 70 Uppsala. E-post: kyrkostyrelsen@svenskakyrkan.se