Other languages with Google Translate

Use Google to automatically translate this website. We take no responsibility for the accuracy of the translation.

Usko on luottamus

Rakhaus oon pohja ja tavote kristilisessä uskossa. Rakhaus tullee Jumalalta. Rakhaus antaa elämää.

Usko oon luottamus

Kristilinen usko oon luottamus antheeksiantavhaan ja rakastavhaan Jumahlaan, joka oon aina myötä meän elämässä ja antaa tukea, johtaa ja uuistaa. Sanothaan ette ei kukhaan ole koskhaan nähny Jumalaa. Jeesus Kristus ja hänen elämäntyö opettaa meät tuntemhaan Jumalan. Met saama nähhä kuka ja minkälainen Jumala oon. Sen vuoksi Raamatun selitykset Jeesuksesta oon yin kristilisessä uskossa.

Rukkous kantaa

Rukkous oon tavalisiin tie uskhoon. Sie et tartte uskoa ette saattaa rukkoila, sie saatat alkaa rukkouksella.

Rukkoileminen kertoo aukeimesta syämestä ja kaipauksesta Jumalaa. Rukkoileminen saattaa olla ette puhua Jumalalle eli vain ette olla hiljanen Jumalan eessä. Rukkoileminen saattaa olla ette selittää, kysyä, tahtoa apua, kiittää ja piiain kaikhiin tärkein: ette luovuttaa ittensä Jumalalle.

Kristilinen uskontunnustus

Kristilinen kirkko tunnustaa ette oon ainuasthaan yks Jumala – Isä, Poika ja Pyhä Henki – joka luopii, pelastaa ja antaa elämää. Ruottin kirkko oon osa mailmanlaajasta kirkosta ja jakkaa kristilisen uskontunnustuksen ja ylistää pyhhää kolminaisuutta. Usko tullee ilmi uskontunnustuksessa sanoila ja teoila, mikä oon perine apostoolisesta aijasta. Uskontunnustus oon ilme uskole, yritys selvittää perustavan sisälön uskossa, mutta ei ole silti aihe ittele uskole.

Kolmela vanheemalla uskontunnustuksela oon erikoisasema ilhmeenä uskon ja kirkon jatkuvaisuuesta vuosisatojen aikana. Apostoolinen uskontunnustus meänkielelä.  

Evankeelislyterilainen kirkko

Ruottin kirkko kuuluu evankeelislytterilaisseen perintheesseen, joka yhistyy tunnustuskirjotuksela, Augsburginen tunnustus, vuesta 1530.

Uskonpuhistuksen aikana tunnustuskirjotukset olit ohjaavat totistukset kunka sai vastauksen sen aijan kysymyksiin uskon kautta.