Other languages with Google Translate

Use Google to automatically translate this website. We take no responsibility for the accuracy of the translation.

Náitaleapmi

Áiggut go don náitalit? Lihku dutnje! Dán siiddus gávnnat dieđuid girkoheajaid birra.

Girkoheajat

Buresboahtin ávvudit dudno ráhkisvuođa ja náitalit Ruoŧa girkus. Girkoheajain rohkodallá báhppa ja buot headjaguossit dudno náitaleami náitalanlohpádusa mielde ja dasto sáddejit dudno mátkái buressivdnádusaiguin.

Gáibádus girkoheajaide lea ahte okta dudnos lea miellahttu Ruoŧa girkus. Dat ahte nubbi dudnos gullá eará girkui dahje oskui ii eastat girkonáitaleami. Ruoŧa girku náitá sihke homo- ja heteroseksuála báraid.

Gos?

Háliideahppi go náitalit girkus, jávregáttis dahje soames eará báikkis? Váldi oktavuođa dainna searvegottiin gos háliideahppi náitalit buori áiggis ovdal heajaid ja muitaleahkki makkár sávaldagat dudnos leat. Bivnnuheamos náitalangirkuid ferte várret juo ovtta jagi ovdagihtii.

Náitalangirku ja náitaleapmi lea dábálaččat nuvttá. Jus háliideahppi erenoamáš fearániid mat buktet mielddis lassegoluid de máhttibeahtti šiehtadallat vejolaš buhtadusa birra searvegottiin. 

Náitaleapmi sámegillii dahje guovtti gillii

Háliideahppi go náitaleami leat sámegillii dahje guovtti gillii? Váldi oktavuođa dainna searvegottiin gos háliideahppi náitalit ja dieđiheahkki ahte dáhtubeahtti guovttegielat báhpa. Báhppa máhttá maiddái leat veahkkin válljet sálmmaid ja lávlagiid guovtti gillii. Galgabeahtti diŋgot báhpa buori áiggis, erenoamážit jus áigubeahtti náitalit geasi áiggi.

Dehálaš báhpirat!

Jus galgá beassat náitalit de ferte leat nu gohččon eastadangeahččaleapmi. Dan oažžu Vearrudoaimmahagas. Eastadangeahččaleapmi lea gustovaš 4 mánu dan rájis go čállui. Oktan eastadangeahččaleami de sádde Vearrodoaimmahat skovi gos almmuha goarggu ja dat galgá sáddejuvvot ruovttoluotta Vearrodoaimmahahkii ovdal náitaleami. Dalle go doai gávnnadeahppi báhpain ja ságastehpet náitaleami birra de galgabeahtti addit eastadangeahččaleami sutnje. Duođaštus lea eaktu jus galgá beassat náitalit.

Dalle go bárra mat galgaba náitalit dieđiheaba sudno dáhtu ráhkistit goabbat guoibmiska de soai čatnaba iežaska náitaleapmái ja ahte buoremus vejolaš láhkái doaibmat nu ahte bissuba lihkolažžan.

Girkolaš buressivdnádus náitaleapmái mii juo lea dahkkon 

Jus juo leahppi náitalan, ovdamearkka dihte magistráhtas dahje eará riikkas de máhttibeahtti oažžut girkolaš buressivdnádusa dudno náitaleapmái Ruoŧas. Náitosa buressivdnádus sulastahttá náitalangirkomeanu.
Leat go dus gažaldagat náitaleami birra?
Váldde oktavuođa du searvegottiin.