Girkkojugálvis
Buorisboahtem basodittjat dunnu gieresvuodav ja válldutjit Svieriga girkkon. Girkkofiesstidijn härrá ja gájkka jugálvisguosse råhkåli dunnu gállasjvuoda åvdås gállasjvuohtajáhtoj maŋŋela ja dåj rájadallabihtte dunnu mannuj buorissjivnnjádusáj.
Rávkalvis fiesstimij girkkon la binnemusát nubbe válldárijs la sebrulasj Svieriga girkkon.Vájku nubbe gullu ietjá girkkuj jali jáhkkuj ij la härránis girkko fiesstimij. Svieriga girkko fiessti goappátjagá homo- ja heteroseksuálalasj párajt.
Gånna?
Sihtabihtte gus válldut girkkon, jávrregátten jali ietjá sajen? Aktavuodav vállde tjoaggulvisájn gånnå sihtabihtte válldut ájge bále jugálvisá åvddåla ja giehtto dunnu sávaldagáj birra. Fiesstimgirkko ma ienemusát árvvon li viertti diŋŋgot juo jagev åvddåla.
Fiesstimgirkko ja fiesstim la ienemusát mávsok. Jus sihtabihtte sierraásadimijt majn li duodde gålo de máhttebihtte sjiehtadallat mávso birra tjoaggulvisájn.
Fiesstim sámegiellaj jali guovte giellaj
Sihtabihtte gus dunnu fiesstimav sámegiellaj jali guovte giellaj? Aktavuodav vállde tjoaggulvisájn gånnå sihtabihtte fiesstiduvvat ja javlle dåj sihtabihtte guovtegielak härráv. Härrá máhttá aj dunnuv viehkedit sálmajt ja lávllagijt guovte giellaj válljit. Vierttibihtte härráv diŋŋgot ájge bále, sierraláhkáj jus ájggobihtte giessejugálvisáv adnet.
Ájnas páhppára!
Fiesstiduvátjit dárbaj nåv gåhtjodum härránisgähttjalimev. Dav oadtjobihtte värrodåjmadagás/Skatteverket. Härránisgähttjalimduodastus la fámon 4 máno almodimes. Aktan härránisgähttjalimduodastusájn värrodåjmadahka rádjá aj blankehtav diededibme máddonamá birra mij galggá ruoptusrájaduvvat tjáledum värrodåjmadahkaj fiesstima åvddåla. Gå galggabihtte härrájn gávnadit ságastittjat fiesstima birra de máhttebihtte vaddet härránisgähttjalimduodastusáv sunji. Duodastusáv hähttu adnet fiesstimij.
Gå párra mij galggá galggá fiesstiduvvat tjielggiba sunnu sidodijt nubbe nuppev iehttset de sjaddaba välggogisá gállasjvuohtaj ja rahtjat aktisasj lihkkuj.
Girkko buorissjivnnjádus gállasjvuodas mij la juo dáhpájduvvam
Jus lihppe juo válldum, buojkulvissan magistráhtajn jali ietjá rijkan, de máhttebihtte oadtjot girkko buorissjivnnjadusáv dunnu gállasjvuodas Svierigin. Gállasjvuoda buorissjivnnjádus sjimustahttá fiesstimjubmeldievnastusáv.
Le gus dujna gatjálvisá fiesstima birra?
Aktavuodav válde duv tjoaggulvisájn/församling.