Luleju bismagotti birra

Luleju bismagoddi vuođđuduvvui jagi 1904 ja lea okta Ruoŧa girku golbmanuppelohkái bismagottiin. Dás orrot badjelaš 513000 olbmo guovtti leanas, Norrbottenis ja Västerbottenis.

Dat gokčá goalmmát oasi Ruoŧa eatnama viidodagas, Gárasavvona searvegottis nuortan gitta Nordmalinga searvegoddái oarján.

Dan rájis go Luleju bismagoddi vuođđuduvvui lea olmmošlohku šaddan guovttegeardánin. Guovllus leat dan rájis dáhpáhuvvan deaivvadeamit luonddu ja gávpoga gaskka, giellaunnitloguid gaskka ja guovtti stuora oskulihkadusa gaskka mat leat vuolggahuvvon dáppe: EFS, Evangelalaš eamiriikkavuođđudus ja leastadianisma, davviriikkaid agi stuorimus oskulihkadus.

Searvegoddi lea vuođđun

Ruoŧa girku doaimmaid vuođđun leat searvegottit. Luleju bismagottis leat 57 searvegotti. Bismagoddi doaibmá daidda doarjjan, hálddaša bismagotti oami (daid nu gohčoduvvon báhpabálkáomiid) ja geahččá bearrái doaimmaid ja vihahemiid (báhpaid ja diakonaid).

Jođiheapmi ja organiseren

Ruoŧa girku lea demokráhtalaš organisašuvdna ja bismagotti alimus mearrideaddji orgánan lea bismaváldegoddi, mii válljejuvvo girkoválggain juohke njealját jagi. Bismaváldegoddi namuha bismagoddestivrra mii lea doaibmi orgánan.

Bispa jođiha bismagotti ja lea ságadoallin bismagoddestivrras ja duopmokapihttalis, mii veahkeha bisppa bearráigeahčuin. Bismagotti direktevra jođiha bismmagotti kansliija.

Girku mas leat olu miellahtut

Luleju bismagoddi lea oassi Ruoŧa girkus, mii lea evangelalaš-luteralaš oskku oktasašgoddi mas 64,5 proseantta álbmogis leat miellahtut (2014). Luleju bismagottis lea dát lohku 74 proseantta (2014). Das leat badjelaš 1000 mielbargi, 1280 luohttámušolbmo, 6234 koaralávlu ja 400 nuorra rihppaskuvlajođiheaddji.

Duopmogirku ja bismagotti kansliija

Luleju duopmogirku lea gávpoga gasku. Dat ceggejuvvui jagi 1893 ođđagohtalaš málliin ja lea Ruoŧa ođđaseamos duopmogirku. Bismagotti kansliija lea duopmogirkus geađgebálkestaga dobbelis, Stationsgatan 40:s. Dát boares viessu lea jagis 1888.

Luleju bismagoddi

Poastačujuhus: Box 942, 97128 Luleå

Tel: 0920-264700

Fáksa: 0920-264770

E-poasta: lulea.stift@svenskakyrkan.se

Facebook: facebook.com/luleastift

 

Váldde oktavuođa bargoveagain